السلام عليكم ورحمة الله وبركاته.... نبدي أول موضوع وهو موضوع الصراحه جدا خطير.. ومسبب مشاكل كبيره للطلبه الكويتيين خصوصا وجميع الطلبه من الخليج عموما...
الطالب الكويتي أول ما يسمع انه طلعتله بعثه لأمريكا يستانس ويطير من الفرحه.. ويعتقد انه بيعيش اب مكان حلووو وايد وراح يستانس وراح يشوف شي ماشافه وراح يتعلم....طبعا ماراح اقص عليكم من ناحية التعليم الكل يعرف انه أمريكا قويه وايد بالتعليم.. مو اقوى من اوروبا ولكن مو موضوعنا هذا..
طبعا الكل يدري عن الندوه اللي يسويها اتحاد الطلبه مع التنسيق مع وزارة التعليم العالي في الكويت للطلبه المستجدين.. ويقولولهم راح تشوفون كيت وكيت وراح تكون الحياة حلوه وراح تكون الحياة سهله بغض النظر عن الغربه ولكن مواضيعك تمشي سهالات.. ولكنهم نسوا شي خطير!!!!
بالسابق الطالب الكويتي او الخليجي لمن يوصل أمريكا.. يقدم طلب للحصول على بطاقه تسمى بالسوشيال سيكيوريتي نمبر.. وهذه البطاقه تكون مثل كرت صغير وفيه عليها رقم.. هالرقم لمن تعطيه حق شركه من الشركات او البنوك.. يقدرون يجيكون على التاريخ مالك كله من اول يوم دخلت امريكا.. شنو شريت وشنو خذيت وشنو وشنو.... وهذه البطاقه طبعا.. بالاختصار المفيد.. ماتقدر تشتري ولا شي من المتطلبات البسيطه بدونها!!!
بشهر ديسمبر اللي طاف.. الحكومه الامريكيه وقفت اصدار هذه البطاقه للطلبه الخليجيين خصوصا وبعض الطلبه العرب تحت شعار "للتقليل من الارهاب" طبعا هالشعار ملينه منه
والحين صار لمن يجي الطالب الكويتي اهني امريكا... ينهبونه نهب بسبب عدم حمله هالبطاقه.. يعني بتأجرلك شقه تدفع تأمين مالا يقل عن ميه ولا ميه وخمسين دولار وصاعد.. ابتاخذ خط تلفون تدفع تأمين لا يقل عن خمسميه دولار!!! تصور.. طالب بالجامعه يدفع خمسميه دولار بس عشان يشتري خط تلفون؟؟؟ وناهيك عن السياره للي ماعندهم كاش...لوتنطبق السما على الارض مايقدر يشتريها اقساط بدون هالبطاقه!!!. وغيره من الامور اللي تتعلق بالبنوك..
أنا بس ابي اعرف... السفاره الكويتيه أو الملحق الثقافي الكويتي ليش مايتحرك بخصوص هالمسأله؟؟؟ يقصون عالطلبه اول مايوصلون يعطونك ورقه لمن يهمه الأمر بأنك تستلم راتب ويقولولك هذي تفيدك.. وبنفس الورقه كاتبين ان الملحق الثقافي غير مسؤول عن أي عمليات ماليه للطالب؟؟؟؟؟؟ وين الفايده فيها؟؟؟
انزين والطالب اللي ماعنده فلوس يشتري سياره كاش؟؟؟ والطالب اللي ماعنده خمسميه دولار يدفعها بس عشان خط تلفون؟؟؟
يجيك واحد يقولك تقدر تاخذ خدمة الدفع المسبق بدون كرت السوشيال.. طيب الدفع المسبق بمجرد انك تتصل في شخص بدون مايرد عليك .. يسحب من رصيدك؟؟؟ انا شخصيا اعرف طلبه يدفعون مالا يقل عن خمسين الى اميه دولار كل أسبوع.. وركز على كل اسبوع.. بس عشان يتصل في ربعه ولا في اهله ولا حتى في ربعه اللي بأمريكا؟؟؟؟؟
وينكم يا اتحاد الطلبه عن هالموضوع؟؟؟ ووينكم يالملحق الثقافي عن هالموضوع؟؟ كل فتره وفتره لقاءات مع السفاره الامريكيه عالفاضي؟ ليش محد اييب طاري هالموضوع؟ عالاقل يتفقون مع كذا شركه انه الطالب الكويتي ياخذ فيها خدمه مع دعم مادي من الملحق الثقافي؟ حتى ولو كان الدعم المادي مزيف ووهم بس عالاقل الطالب يقدر يشتري هالشغلات؟؟؟
طبعا هذا شيئ واحد من المواضيع اللي الصراحه تخفى عن الناس اللي بالكويت.. الطلبه سابقا كان عندهم كرت السوشيال فمحد يشتكي.. لكن الحين صار الموضوع ماصخ وزاد عن حده.. فنتمنى نسمع رد من اتحاد الطلبه ولا من الملحق الثقافي الكويتي في هالموضوع..
على فكره.. صرحوا بالجرايد قبل اكثر من خمس ايام انه المكافأه الاجتماعيه للطلبه تم صرفها للبنك المركزي.. وكانه للحين ناطرينها.. شكلنا ابنقبض من دبش...
الــلــــهـــم لا اعــــتـــراض!!!!!
3 الـتـعـلـيـقـات:
شوف يالحبيب
اول شي مبروك علينا مدونتك :)
ثاني شي اخذها نصيحة من اخ سابقك ودرس بره ومر بهالسوالف عدل عدل وخلص بدون فايده منهم
لاتعور راسك بالمعاشات والبدلات والمعيشه
محد بيسمع لك وبتقعد متضايق طول الوقت
اهم متى مابغوا عدلوا يعدلون
والا انت خلك بدراستك ووناستك وطلعتك واستمتع بكل لحظه وتعلم من كل شي وخل اخر همك هالسوالف لأنك بتنفخ بجربه مقظوظه
باختصار
هيء نفسك على معاشك
ولاتهيء معاشك على نفسك
بالتوفيج
:))))
ما درست بره بس انا مع العرزاله
استانس
وبعدين اللهم لا اعتراض حقوق الطبع والتوزيع فيها محفظه الله يسلمك :)
العرزاله.. حياك الله ونتشرف فيك... بس اخوي مو مشكله الطلبه طبعا اغلبهم متعودين على المعاش ومتهيئين.. ولكن مو معناتها انحرم من التلفون علبو ماعندي ادفع تأمين صح؟ :)
مهندس.. حياك الله حبيبي.. شنسوي من القهر!!!!
Post a Comment