بعض النواب مهمته اليوميه وشغله الشاغل أن يصرح بالصحف اليوميه.. غير مهتم ولا يدير بال حق نوع التصريح أو مضمون التصريح او حتى الاتهام الموجه منه للجهه المعنيه.. وهالايام للأسف نصف المجلس هكذا.. واتمنى اذا انحل المجلس مانشوفهم مره ثانيه لنه البلد بحاجه الى الإصلاح.. ليس الى كلام جرايد!!
الكل سمع عن حادثة الروضه اللي طب فيها "مختل عقلي" وفعل فعلته السوداء امام المدرسات والطلبه الي في عمر الزهور.. واللي المفروض مايوشوفن هالشي ولا يمرون بهالمواقف وخصوصا في مكان العلم والتعليم.
ثاني يوم اطلعوا لنه جميع الأشكال وكل من هب ودب وتكلم بالجرايد عن هالحادثه.. طبعا البعض منهم استنكر فعلة المختل ولم ينتقد المدرسه او الوزاره لأنه بالنهايه مالهم دخل باللي حصل.. فلو اتهمنا الوزاره بكل مايحصل في المدرسه من قبل الطلاب او اولياء الأمور لكانت مهزله عظيمه مالها اول ولا تالي..
طلعلك البطل القومي الطبطبائي واتهم الوزيرة الفاضله نوريه الصبيح بالمهزله اللي صارت.. وقال لها ليش ما أقريتي قانون تركيب كاميرات مراقبه على أسوار المدارس.. لمن انركز على مثل هالكلام.. نقدر نستنتج شغلتين.. يا انه النائب الفاضل له نصيب في هالمناقصه.. أو أنه النائب الفاضل بيصرح بالجرايد وبس بدون سبب وخرابيط.. وطبعا الكل يدري انه بعض الإخونجيه مايشتهي نوريه لكونها إمرأه بالمجلس ولإنها ماتمشي واسطاتهم!!
طبعا لو افترضنا انهم ركبوا كاميرات مراقبه.. صدقوني ياجماعه من ثاني يوم راح تشوف حدس وربعهم كلهم يلعلعون بالمجلس ويتهمون الوزيره يااا فلانه شلون تصورين بناتنه وعرضنه وخواتنه وماعرف ايش.. وكأنه بالديره مافي ولا واحد عنده غيره على أهله غيرهم..
الظاهر حدس وربعهم دروا انه السالفه فيها حل مجلس واعادة انتخاب.. فقاموا يتفلسفون بالجرايد وكل واحد يسل سيفه البتار عشان يعزز ظهوره على الساحه الإعلاميه فقط لاغير.. تماما مثل ما تفلسف سعدون حماد وطلب انه يسوون مخارج ومداخل يديده لصباح السالم.. ماجنه صباح السالم متروسه مداخل من كل الجهات ومن كل الطرق العامه والداخليه!!!
بالنهايه ماقول الا اللهم لا شماته.. والله لايورينا هالاشكال والعقليات مره ثانيه بالمجلس اذا ما تم حله.. آآل إيييه آآآل ركبوا كاميرات مراقبه.. ماتبي اسلاك شائكه وياهم عشان تكتمل السالفه بعد؟ ونغير اسم المدرسه الى مدرسة غوانتانامو؟ اللهم لا اعترااااض
2 الـتـعـلـيـقـات:
هذا خيار الشعب ..
أو سلطته إن صح التعبير !!
تحياتي :)
نعم للأسف انه هذا خيار الشعب.. ويجونك بعدين يقولك المجلس اداءه مو زين :(
وهكذا يدور الموضوع في حلقه مغلقه مالها لامخرج ولا مدخل.. والعتب عالشعب
قواك الله وشاكرلك مرورك
Post a Comment