بس بالكويت: ترا النقابات والجمعيات يعارضون قانون البصمه تحت عذر يؤثر سلبا على أداء الموظفين
بس بالكويت: ترا النائب يدخل المجلس "حافي" ويخرج منه راعي نفوذ
بس بالكويت: ترا كل مواطن شاب يستلم دعم العماله وهو غير موظف ولا هامه
بس بالكويت: تلغى صفقه كبيره ومربحه للديره فقط لأنه "الحفاي" مالهم نصيب من الكيكه
بس بالكويت: ترا الشاب الحاصل على اعلى الشهادات "حاط ايده على خده" وينطر الديوان لنه ما عنده واسطه
بس بالكويت: الدبلوم يتوظف أسرع من البكالريوس في نفس المجال والبكالريوس يقطونه في مكان غير تخصصه
بس بالكويت: النواب اليوم مع الحكومه... وباجر ضد الحكومه بنفس الموضوع ياترا ليش؟
بس بالكويت: ترسل ايميل لشركة نفط الكويت ولا تحصل على رد.. مع "تطنيش" كامل لمدى اهمية الايميل المرسل للإداره
بس بالكويت: تدرس اربع ولا خمس سنين هندسه وبعدين يقطونك دورات مخصصه للدبلوم ويغصبونك تاخذها على ما يفضى مكان لك.. انزين ليش قبلتوني بالاساس؟
بس بالكويت: ترا ادارات المرور تتسابق على أكبر عدد مخالفات ممكن تحصيله باليوم.. وبالمزاد العلني عالجرايد
بس بالكويت: تشوف الشاب عمره 20 سنه وتوه متوظف وعليه قرض 40 الف؟ ليش؟ لازم تركب بورش ولا ماينفع؟ وتلقاهم يصارخون نبي انطيح القروض؟
بس بالكويت: تشوف الأجنبي يطوف الدور بدون احترام ويمشي شغله في جميع الوزارات والادارات لنه "مندوب فلان" والمواطن لك الله يبا
بس بالكويت: تشوف المجمع متروس اوادم.. لكن المحلات تصفر مافيها احد؟ ونفس الوجوه اللي تمشي بالمجمع يوميا
بس بالكويت: الدكتور اللي متخرج من جامعات معروفه وقويه حاله من حال الدكتور اللي شاريها
بس بالكويت: تشوف صاحبك قاعد بالقهوه اربع وعشرين ساعه واهو طالب مقيد في جامعه في الفلبين ولا الهند تحت تخصص هندسه!!!!
وأخيرا وليس بآخرا.. بس بالكويت: شخص ينسحب امن الدوله اربع مرات وفي كل مره يطلع منها زي الورد ويرد الجامعه والتطبيقي ويدرس فيها.. سبحان الله!!!
الـــلــــهــم لــــا شـــمــاتـــــــه!!!
2 الـتـعـلـيـقـات:
أول شي ترى تنكتب بألف مقصورة مو ممدودة :)
وثاني شي ما أتفق معاك بكلمة كل شاب يستلم .. في وايد عاطلين ومو مسجلين دعم عمالة ..
وثالث شي اليوت جدا رائع ووضعت فيه الكثير من النقاط على الحروف :))
إلى الأمام دائما أخي العزيز :)
يعطيك العافيه أخوي أحمد الحيدر.. شاكرلك التصحيح.. سقط سهوا ماعليه :)
نعم انا لمن اقول كل شاب.. بالطبع فيه شباب مايرضون بهالشي ومو امسجلين فيه.. لكن للأسف الأغلبيه عندها هالامر شي عادي.. بل ويحاول يقنعك بأنك تسجل وياه تماما مثل ما صار وياي آخر مره رديت الديره.. وهذي هي النقطه..
قواك الله وشاكرلك مرورك
Post a Comment