السلام عليكم ورحمة الله وبركاته.. الله يعود علينا وعليكم شهر الخير والبركه انشاءالله....
اليوم حبيت اكتب عن موضوع يحصل تقريبا في كل الاماكن.. وفي كل التجمعات.. وفي اغلب الاحيان يكونون من فئة الشباب.. يعني اعمارهم صغيره بعدهم ماشافوا دنيا على قولتهم.. ولكن قليل ماتحصل في تجمعات واماكن الناس الفاهمه والواعيه.....
في الخارج وخصوصا الطلبه.. كلنه على قلب واحد.. وكل واحد يشيل الثاني والحياة ماشيه من احلى مايكون.. لكن.. المصيبه الكبيره اتييك وانت غافل..
مريت صوب الجامعه رايح محاضرتي متأخر كالعاده.. ولا اسمع حس شباب كويتيين.. استانست طبعا وقلت زين صار عندنه شباب كويتيين بالجامعه.. خل اسلم عليهم.. سلمت عليهم وعطيتهم رقمي وعزمتهم عندي عالفطور قلت خل نتعرف عالشباب شكلهم ازقرتيه..
مرت الايام ومحد اتصل.. قلت يمكن مشغولين ... والا الصدمه الكبرى.. امر يمهم عقب فتره ...سلمت ولا محد فيهم يرد علي السلام.. ولاجنه واقف يمهم؟؟ شسالفه؟ شصاير؟؟ خير؟؟؟ انا كنت مستعيل ورحت المحاضره قلت يمكن عندهم مشكله ولا شي.. مابي اظن ظن السوء فيهم
لكن المصيبه الكبرى انه ظني طلع بمحله.. سألت واحد من اعز ربعي اهني.. قلتله شفيهم فلان وفلان وفلان.. اليوم أسلم عليهم وماردوا علي؟
طبعا هو صاحبي مذهبه يختلف عن مذهبي.. ومن أعز ربعي.. ولاعمرنه اصلا نظرنه للشخص من هالناحيه اقصد طبعا من ناحية المذاهب...
جان يبتسم صاحبي ويقولي يافلان انت ماتدري انه هاللي ذكرتهم ما يواطنون شي اسمه ******.. وذكر اسم مذهبي.. انا اهني ويهي قام يقط الوان.. واخذتني لحظه صمت وتفكير.. وييين؟ ومتى؟ وليش؟؟ ومن متى بالكويت احنه جذي؟؟ وهل لو فرضنا انه احنه بالكويت جذي.. هم بالخارج بعد؟؟؟؟ يعني بالغربه والمفروض كلنه نشيل بعض.. يعملي فيها طائفيه ومذهبيات وفلان ماعرف ايش؟؟
لي متى وهالنوعيات موجوده؟ ياجماعه ترا عمرنا ماكنه جذي بالكويت... دايما تشوف السني مع الشيعي.. والشيعي مع السني.. والمسلم مع المسيحي.. والمسيحي مع المسلم.. عمرنا ما نظرنا حق هالمقاييس.. والريال ولا المره ماينقاسون بالمذهب؟ وين راحوا رياييل قبل؟ ووين راحوا شباب قبل؟؟ هاليهال من وين متعلمين هالعنصريه؟ وليش الكره؟ مو احنا عيال ديره وحده؟
شوف الجنسيات المختلفه اللي يختلفون بالدين بكبره مو فقط اختلاف مذاهب.. شوف اشلون يشيلون بعض بالغربه؟ وشوف شلون كل واحد منهم يتقاسم مع اخوانه المكان ويعيش بضيم بس عشان يشيلهم؟
والله لو تمينا نشوف شباب من هالنوعيات.. راح اتخرب الديره بكل اللي فيها.. هذا يقول فلان ولائه لمادري وين.. وهذا يقول فلان ولائه لمادري وين.. انا ما انكر انه فيه ناس ولائهم مو للديره.. لكن لاتحكم على شخص بمجرد معرفة مذهبه.. لنه عمرنا ماكنه جذي بالديره..لاحول ولا قوة الا بالله
الـــــلــــــهــــم لـــاــ شـــمــــاتـــــه
0 الـتـعـلـيـقـات:
Post a Comment